Africa Express é un espectáculo único. Músicos do ámbito do pop-rock, o hiphop ou o r&b de diferentes procedencias se unen sobre o escenario ás grandes estrelas da música africana para cociñar un concerto moi especial, unha especie de xigantesca jam session de cinco horas. Estes días vimos de coñecer os primeiros nomes de artistas confirmados para participar no concerto de Africa Express na Festa dos Mundos, que se celebra o 7 de agosto na praia de Santa Cristina (Oleiros). Será a primeira e única ocasión de ver na Península este espectáculo, que por primeira vez inclúe artistas galegos e españois.

Damon Albarn, promotor da iniciativa, estará en Oleiros acompañado de estrelas africanas como Amadou & Mariam, Rokia Traoré, Rachid Taha, Femi Kuti coa súa banda The Positive Force ou o rapeiro surafricano Spoek Mathambo. Con eles estarán sobre o escenario o mítico baixista de Led Zeppelin John Paul Jones, o guitarrista dos Yeah Yeah Yeahs Nick Zinner, o líder dos Guillemots Fyfe Dangerfield, o cubano Elíades Ochoa, o rapeiro británico Kano ou o grupo de garage rock londinense The Noisettes. Tamén se uniron á festa Amparo Sánchez, que fora cabeza de Amparanoia, e o canario El Guincho, estrela do indie internacional, ademais dos galegos Triángulo de Amor Bizarro.

Estes son só os primeiros nomes dunha lista máis ampla que se dará a coñecer nos próximos días, ata completar o cartel do que se espera que sexa o mellor Africa Express da historia. Un dos grandes alicientes da Festa dos Mundos, que suma 17 horas de programación con música, danza, teatro de rúa, circo, mercado, mesas de debate… e moitas máis propostas.

Coñece toda a programación da Festa dos Mundos na web do evento.