Este ano, non podemos menos que agardar que a cultura e nomeadamente a música teña o efecto dun sopro de aire fresco que alonxe dunha vez por todas as traxedias das nosas costas; desexamos que este novo ano sexa o primeiro dunha nova era na que unha NORDESÍA de ilusión e de unidade renove os desastrosos efectos dunha traxedia que se extende dende o mar ó interior enchendo de indignación e dor cada recuncho das nosas almas.

Dende NORDESÍA estamos a traballar en proxectos que revirtan nun beneficio colectivo, xa que como empresa galega que representa artistas e creadores galegos, conquerimos estar presentes nos escenarios de máis de vinte países de Europa e America acadando éxitos, premios e un sen fin de loubanzas que serviron e serven para que a nosa música e a nosa terra ocupen o xusto lugar que lles corresponde no escenario internacional; durante este mesmo período demos a coñecer entre o público galego artistas chegados de todos os recunchos do mundo, artistas que sempre levaron desta terra unha fonda impresión e gratitude e que hoxe comparten con nós a dor da catástrofe.

As nosas novas propostas son o froito do traballo feito ó longo deste ano, un traballo que, dende a investigación o estudio e a presencia nos máis importantes foros internacionais, que nos permite ofrecervos unha proposta global na que se inclúen artistas novos de gran interés con nomes clásicos do panorama internacional conformando un caleidoscopio de xéneros e tendencias, arumes e sabores e que nos amosan e achegan ó mundo dende a diversidade como o máis valioso tesouro sobre o que gravita a humanidade.

Desexamos pois, que a música que aquí vos ofertamos sexa unha canle para atopar o tan desexado entendimento entre xentes, pobos e culturas. Dende este mail, podedes acceder ás páxinas webs dos diferentes artistas que vos presentamos con tan só facer un doble click enriba do lugar indicado, así teredes a oportunidade de ver, oir e coñecer algo máis destes artistas nunha apaixonante viaxe para a que non fai falla reservar asento.