A diversidade cultural move o mundo e a música é un dos seus principais medios de transporte. En Nordesía Produccións somos conscientes dese feito nun século, o que nos toca vivir, necesitado da comunicación entre xentes e culturas distantes na xeografía do globo. A nosa experiencia indícanos que a pluralidade das músicas do mundo, sen resultar paradóxico, ten un efecto de cohesión e afonda no entendimento universal.

Por esa razón, afrontamos un novo ano coa ilusión de representar e apoiar a creación en Galicia e, ao mesmo tempo, ofrecer ao público propostas chegadas de puntos distantes na xeografía mundial, que proban que sociedade global non equivale á homoxeneización cultural.

Despedimos un ano, o 2004, cun haber marcado polo éxito, non só entendido en termos cuantitativos. Se ben fumos artífices do que xa está considerado o evento máis multitudinario do ano en toda a Península -A Festa dos Mundos, Praia de Santa Cristina, Oleiros, sete de agosto, patrocinada polo Xacobeo- e traballamos na organización de máis de 300 espectáculos, non podemos obviar outras moitas iniciativas que, en forma de festivais e ciclos, trouxeron a Galicia a artistas de referencia mundial.

En Nordesía Produccións afrontamos este ano 2005 tendo presente a cotío unha das premisas que moveron á constitución desta empresa: conseguir a satisfacción dos nosos clientes e do público. En definitiva, supón o obxectivo do traballo que desenvolvemos en todas as intervencións culturais. Son resultados que van máis alá das cifras e que, en moitas ocasións, concrétanse simplemente no sorriso dun espectador á saida dun espectáculo.

AS NOSAS PROPOSTAS ARTÍSTICAS

As novas propostas de Nordesía Produccións en canto a artistas galegos conxugan figuras consolidadas con novos nomes propios fóra de clichés que están a seducir ao público.
Puxemos en marcha ao longo do pasado ano proxectos que implican a artistas e creadores galegos cuia vitalidade poñerase de manifesto durante este ano 2005. Ao Pé da Letra reune as propostas máis innovadoras ao redor da palabra en Galicia, explorando as alturas e profundidades da linguaxe no territorio da música popular contemporánea. Un espectáculo colectivo que, ademais, acolle no seu seo singularidades e proxectos individuais polos que Nordesía Produccións aposta: o pop espido de NARF, o espiritu dunha belle epoque no século XXI de Marful, o intimismo dun autor como Xabier Diaz e o camiño propio da extraordinaria cantante e instrumentista de Berrogüetto, Guadi Galego.

Non podemos deixar de amosar a satisfacción que nos produce contar con Mercedes Peón quen, desde o seu ser, o seu lugar, a súa cultura, universaliza sons e sentimentos, sendo sen nengunha dúbida unha das figuras máis carismáticas da música galega de todos os tempos. Fortes personalidades artísticas fúndense tamén no espectáculo Mundo Café, no que tres cantautores de Galicia, País Basco e Cataluña: NARF, Xabier Muguruza e Miquel Gil, representarán un mundo músico-literario imaxinativo, sen fronteiras e sen complexos.

No panorama internacional decantámonos polo que denominamos sen temor a trabucarnos personalidades artísticas; figuras cuio nome é sinónimo de calidade, elegancia e mestría. Como exemplo, o finés Kimmo Pohjonen, que deslumbrou na súa presentación na península durante o Mercat de Musica Viva de Vic (Setembro, 2004) converténdose nunha das propostas musicais máis vangardistas en Europa.

Desde anos atrás adiantámonos no que está a ser o fenómeno da música brasileira en toda Europa -para algúns, un xénero en sí mesmo- e seguiremos ofrecendo unha selección das delicatessen cociñadas neste paraiso musical. Asimesmo, sabedores do interese crecente que suscitan no público as propostas chegadas de África e Asia, recurrimos a artistas singulares e emblemáticos de ambos continentes. En definitiva, as propostas de Nordesía Produccións para este ano percorren o ancho do planeta na percura dos seus tesouros musicais, sen esquecer os novos proxectos musicais xurdidos nunha Europa caracterizada pola mestura de identidades e a fusión musical.

Sentímonos satisfeitos de poder presentar para este novo ano propostas que, unidas polos seus vértices, debuxan un mapamundi. Temos o convencimento de que a nosa presencia en eventos e foros internacionais e, por suposto, a nosa experiencia, resultan determinantes para ofrecer artistas que espertan os sentidos do público. Con ese rumbo, seguimos navegando.