Sorpresa atlántica. Un estilo de danza que molla o aire. Velaí outra fecunda realidade artística que chega dende Galicia -absolutamente nova- con raices tan fondas como o propio océano.
   Dicímolo con orgullo. Nos últimos anos os galegos non deixamos de sorprender pola nosa creatividade. Coa Democracia xurdiu a primeira xeración que tivo oportunidade de formarse ben na cultura galega e na cultura universal. Aqueles rapaces regálannos agora unha arte plena, cargada co poder desta Fisterra, e, ao tempo, capaz de emocionar a calquera ser humano.
   A lista é longa. Dende o virtuosismo sonoro de Mercedes Peón, Xosé Manuel Budiño ou Carlos Nuñez, ao talento escénico de Luis Tosar ou Maria Pujalte. Libro a libro, Manolo Rivas e Suso de Toro estannos ensinando a ver o planeta con ollos atlánticos. E a eclosión galega continúa. Fermosa mostra de intercambio e diversidade.
   Música, cinema, teatro, literatura. E na danza?.
   En Galicia todas as avoas son quen de marcar os puntos dalgún baile enxebre. Un patrimonio estético que durante moito tempo, case exclusivamente, tivo como único medio de expresión o camiño dos grupos folclóricos.
   "Alento" é a historia dun grande encontro: Vicente Colomer e Jaime P. Díaz, dous artistas formados na danza clásica e no baile tradicional. Os dous necesitaban crear coreografías que expresasen a súa realidade contemporánea. Mais nos dous latexaba a mesma vertixe: a absoluta falta de referentes.
   Como indicamos, o baile galego sempre aparece asociado a un entorno decimonónico: o pazo, o cruceiro, os camiños da emigración a América... Vicente e Jaime querían moito máis. Eles precisaban debuxar cos seus corpos as historias do milenio que comeza.
   E chegou un novo encontro: Xosé Lois Romero, un compositor formado na música tradicional que, como eles, precisaba lanzar dunha vez o seu berro de modernidade.
   Foi a grande sinerxia. Arstistas que acadaron, a través da súa unión, a verdadeira plenitude. Jaime, Vicente e Xosé Lois son o epicentro dun furacán de músicos e bailaríns que se dispoñen a inventar unha nova linguaxe. Así de sinxelo, así de marabilloso.
   En "Alento" todo é sorprendente, todo orixinal, precisamente porque coñecen moi ben as súas orixes.
   Dispóñanse a descubrir a nova voz do vello Altántico. Atrévanse a mollarse en tanta luz.

Xurxo Souto