Neste segunda edición do ciclo Con Voz Propia o concello de Pontevedra e a concellaría de Cultura seguen a apostar polas voces ibéricas, portadoras de aires atlánticos, mediterráneos ou cantábricos. Voces singulares que, partindo das súas raíces, voan moi alto, até traspasar fronteiras. Voces que contan o seu mundo interior, voces exquisitas e delicadas como a de Lidia Pujol, que traza a poesía no ar en cada nota que emite. Do noso país irmán chéganos unha das propostas máis persoais e lúcidas do panorama musical portugués, João Afonso, un dos compositores de referencia no seu país e na nosa terra. Cunha voz que namora e cautiva, como a voz andaluza de Pasión Vega, que nunca deixa de sorprender co seu amplo rexistro e, sobre todo, pola súa fermosura, trascendendo as limitacións do xénero da copla e creou un estilo novo e único. Viaxaremos tamén a Euskadi para descubrir a Amaia Zubiría e facer xustiza desde Galiza a unha das mellores voces da península que expresa na súa língua as súas inquedanzas, os seus sentimentos profundos de amor ou desamor, da súa condición de muller, através das súas magníficas composicións.

Da terra chéganos un escaparate das mellores músicas de Galiza, un espectáculo na boca da realidade, un punto de encontro de artistas e proxectos musicais galegos que queren tomar a palabra. Universos musicais diferentes e complementarios: desde a música popular urbana de Marful pasando pola poética de NARF, ou as rimas de Non Residentz, o talento de Guadi Galego e Guillermo Fernández, ao servizo de ritmos e palabras para unha mensaxe espida e contemporánea, o collage de sons de Safari Orquestra ou as músicas de salitre de Xabier Diaz.

Voces a planear sobre as nosas cabezas, a sementar emocións nos nosos corazóns, abertos a estes ecos co alento propio, único e intransferibel.

Uxía Senlle