A década pasada, algo estraño se comezou a mover no plácido mundo do folk estadounidense. Xurdiron unha serie de voces raras que practicaban un folk que non o parecía, propostas ás veces líricas, ás veces extravagantes, outras mestizas. Esa ventá aberta bautizada como anti folk, freak folk, ou New Weird America, segue aberta e por aí entra o aire fresco de, entre outros, Devendra Banhart. A súa música, entre melancólica e bucólica, ten influencias do folk menos coñecido, a psicodelia, o tropicalismo e a música latina. Con discos como Rejoicing in the Hands e Cripple Crow cativou a público e crítica, que o compararon con xigantes como Tim Buckley, Nick Drake ou Syd Barret.

Devendra Banhart está este venres no festival Vigo Transforma para presentar o disco What Will Be. O cartel de festival inclúe entre outras as actuacións de Triángulo de Amor Bizarro, Jeff Tweedy, Fanfarlo, Os Mutantes e The XX o venres, e as de The Divine Comedy, Orbital, Fischerspooner ou Delafé y las Flores Azules o sábado. A cita, no peirao de transatlánticos de Vigo.

O 7 de agosto, todos os mundos citaranse na praia de Santa Cristina, en Oleiros. A Festa dos Mundos é unha proposta cultural e festiva pensada para todo tipo de públicos, organizada polo Xacobeo e producida por Nordesía. Nun mesmo lugar e nun só día atopamos espectáculos e actividades chegadas de todos os recunchos do planeta: música, danza, pasacalles, maxia, artes circenses, actividades para a infancia, mercado, gastronomía, conferencias… A programación encherá a praia e os parques, paseos e rúas da vila das 11 da mañá ás 4.30 horas.

A partir da media tarde o escenario principal acollerá a programación musical. Alí estarán Uxía, que este ano fai 25 de carreira musical; a superestrela chinesa Sa Dingding, que mestura tradición e sons electrónicos; os colombianos Choc Quib Town, grupo de referencia da música urbana latina e candidatos ao Grammy; e o espectáculo Africa Express: un evento único no que arredor de Damon Albarn (Blur, Gorillaz) se reúnen algúns dos músicos máis talentosos do mundo. Ao longo de cinco horas pasan polo escenario figuras internacionais e as grandes estrelas da música africana para mesturar diferentes ritmos (rock, pop, indie, world music, soul, r&b, hip hop…). Unha oportunidade única de ver este espectáculo na Península, nun formato e cunha relación de artistas aínda sen desvelar que non se volverá repetir en ningún outro lugar do mundo.

A Festa dos Mundos xa se celebrou no anterior Ano Xacobeo de 2004. Daquela reuniu a milleiros de ducias de persoas ao son de Carlinhos Brown, Orishas ou Budiño. Este ano a festa acada novas dimensións coa inclusión de programación infantil e de danza, dun mercado intercultural, un espazo para a reflexión e o debate, e sobre todo dunha concepción sostible e responsable coa conservación do planeta.

O Concello de Vigo remodelou o seu Auditorio Municipal, que a partir de agora acollerá unha programación estable de artes escénicas. A inauguración deste renovado espazo na Casa do Concello correrá a cargo de Quique Peón Cía, co seu espectáculo ‘Ovay’. Será o martes 22 de xuño ás 20.30 horas. A asistencia é gratuíta mediante invitación, que se pode recoller no despacho de billetes do Auditorio o luns e o martes de 18 a 20 horas.

‘Ovay’ é a viaxe interior dun bailarín, o percorrido polos estadios da súa evolución persoal. Unha peza na que a danza contemporánea bebe no baile tradicional para expresar unha inquedanza na madurez vital e artística de Quique Peón. ‘Ovay’ é danza con música en directo: gaita, acordeón, zanfona, requinta e percusións tradicionais da man de Xosé Lois Romero e Suso Vaamonde. Quique Peón embárcase neste primeiro proxecto propio de danza contemporánea, á que chega desde a súa experiencia como bailarín, coreógrafo, profesor e investigador de danza e música tradicional.

Máis información sobre ‘Ovay’ na web de Quique Peón Cía.

As correntes innovadoras do jazz europeo volven ser o eixo da programación do Imaxina Sons, o 6º Festival de Jazz de Vigo. Do 23 de xuño ao 4 de xullo, o certame organizado pola Concellería de Cultura e Animación Sociocultural do Concello de Vigo presenta un programa con pasacalles, mesas de debate, sesións nos pubs de “jazz na noite”, clases maxistrais, un espectáculo para público infantil e un bo feixe de concertos.

Entre os nomes propios desta edición destacan o do pianista francés Martial Solal, que abre o certame o 23 de xuño; o proxecto Root Africaine, con Aldo Romano, Louis Sclavis e Henri Texier co fotógrafo Guy le Querrec (27 de xuño) e o Dave Douglas Quintet, encabezado pola máis europea das figuras estadounidenses do jazz actual (4 de xullo).

O festival conta de novo cunha importante presenza de proxectos galegos, como os de Marcos Pin Factor -E Reset-, Monkillos, Roberto Somoza Jazz Orquestra ou as participacións de Baldo Martínez en TriEZ e a ponte cos Estados Unidos de Alberto Conde e Steve Brown en Atlantic Bridge. Outras propostas de jazz europeo presentes no programa son as de Lluís Vidal Trio con Dave Douglas & Perico Sambeat, Pierre Favre Solo, Carlos “Zíngaro” Solo, Marisco Fresco, Red Trio + John Butcher, Arild Andersen Trio ou Franz Koglmann Monoblue Quartet, entre outras.

A edición de 2010 quere gañar novos públicos, programar artistas de calidade e crear un ambiente festivo en toda a cidade durante os doce días que dura Imaxina Sons. Ese ambiente que une jazz e festa xa se pode respirar nas rúas: o sábado pasado arrancou o Imaxina na Rúa, no que a canteira de jazz galega leva a súa música aos espazos públicos da cidade. Este sábado 19 de xuño toca segunda sesión, a cargo da Orquestra A Tempo de Pontevedra.

A cantante fracesa de orixe bereber Hindi Zahra é unha das revelacións do momento. Handmade é o seu primeiro disco, co que está triunfando en Francia e en media Europa e que EMI acaba de lanzar no mercado español. Hindi Zahra inicia o 27 de xuño en Bruxelas unha xira que a levará a varios países europeos, Marrocos e Canadá. Estará tamén en Cartagena o 19 de xullo, dentro do festival La Mar de Músicas. Alí levará a súa mestura de baladas folk, soul urbano e blues do deserto.

En The Guardian, Kitty Empire cita a Billy Holliday, Norah Jones, M.I.A. e Ali Farka Touré para describir a voz e a música de Hindi Zahra: “sería un erro crer que este disco, que xa alcanzou o número 2 nas listas europeas de músicas do mundo, é simple música amáble e cosmopolita. A clave é o ritmo de Hindi, un galope cadencioso que ten ecos do embriagador blues do desierto popularizado por artistas como o falecido Ali Farka Touré”.

Máis información na web da artista e no seu MySpace.