En 1959 Raimón lanzaba a súa música “Al vent“. Nacía a Nova Cançó, un movemento que transcendía o seu carácter musical para converterse nunha corrente de contestación ao franquismo. Cincuenta anos despois, o Departameno de Cultura da Generalitat catalana encargoulle ao polifacético Marc Parrot que reinterprete cunha lectura moderna e actual esas letras e melodías que figuran xa na memoria colectiva, dentro e fóra de Cataluña. Nace así o proxecto “50 anos da Nova Cançó“.
Agora poderá escoitarse ao vivo en Ourense (5 de febreiro, 22:00h, Auditorio Municipal) e Santiago de Compostela (6 de febreiro, 21:00h, Teatro Principal). Marc Parrot e a súa banda revisarán temas de Raimon, Lluís Llach, Sisa, Serrat, Maria del Mar Bonet, Pau Riba, Joan Isaac, Ovidi Montllor, etc., cunha coidada posta en escena. Esta minixira por Galiza celébranse en virtude do convenio subscrito entre o Institut Catalá de les Indùstries Culturals e a Agadic para desenvolver o programa Catalan Music on Tourconta. Conta ademais co apoio do Mercat de la Música Viva de Vic e o Festival Acústica de Figueres.
Nos vindeiros días poranse á venda as entradas: para o concerto en Ourense poden adquirirse no despacho de billetes electrónico de Caixanova, e para o de Santiago no de Caixa Galicia.
Aló Irmao é o proxecto musical que comparten Narf e Manecas Costa. Un encontro entre Galiza e Guiné Bissau que se está a manifestar por diversas vías: non só é a música, e tamén o audiovisual e a banda deseñada. Na web de Aló Irmao vén de aparecer a primeira páxina de viñetas dunha serie que pretende achegar unha visión diferente do proceso de conexión artística e humana entre Fran e Manecas. Nas próximas semanas iranse publicando nesa web novas entregas deste cómic creado por Xavier Belho.
Esa conexión artística e humana de Aló Irmao púidose sentir nos seus concertos da xira brasileira. No xornal A Tarde, o máis importante do estado de Bahia, o xornalista Thiago Fernandes escribiu unha crítica eloxiosa do concerto que o dúo realizou o 4 de decembro no Teatro Castro Alves, cualificándoo como un dos mellores concertos celebrados en Salvador no 2009: “Combinado ao talento de Manecas, o resultado foi uma música que traz uma sensaçao de familiaridade, como ouvir uma canção que já se conhece… desde a infância. A guitarra e os violões contidos mas muito bem aplicados de Narf a complementaram perfeitamente e fizeram do Aló Irmao um dos melhores shows que passaram por Salvador neste ano.” Fernandes remata dicindo: “ao final, o duo cumpriu a promesa. Transportou a plateia para outro mundo durante a apresentação, um lugar muito bonito e sobre tudo familiar e acolhedor.”
A semana pasada celebrouse en Logroño a edición 2010 do Actual. Un festival no que estivo presente a banda italiana Nidi d’Arac, que resultou unha das grandes triunfadoras da presente edición. Participaron na última xornada do festival, o mércores 6, xunto con Afroka e Cornershop.
Na súa edición dixital, El Correo Vasco describe a actuación dos italianos como “un show excitante, unindo coa maior naturalidade cousas tan distantes como o folk italiano, o techno e o rock progresivo”. No xornal La Rioja, destacan que “Nidi d’Arac consegue coa súa música e o seu baile realizar un ritual do que eles chamaron «tarantismo»: unha danza purificadora, unha especie de exorcismo para espantar os vellos espíritos”.
Marc Ayza é un dos baterías con máis proxección da escena jazzística estatal. Desde hai máis dun ano é líder da súa propia banda, na que participan Roger Mas, Tom Warburton, DJ Helios e Core Rhythm. En xaneiro podemos velos en directo en tres datas: o xoves 7 no Club Filloa da Coruña (rúa do Orzán, 31- sótano) ás 22:30h.; o venres 8 no Club Xancara Jazz de Vigo (rúa de Isabel II, 6) ás 24:30 h.; e o sábado 9 no Clavicémbalo de Lugo (rúa dos Paxariños, 23), ás 24:00 h. Os concertos celébranse en virtude do convenio suscrito untre o ICIC e a Agadic para desenvolver o programa Catalan Music on Tour.
Narf despide o 2009 cun concerto na Biblioteca Ánxel Casal de Santiago de Compostela. Coa súa guitarra volverá amosar ese son persoal que lle dá un carácter universal á súa música. No concerto ofrecerá unha escolma de pezas dos seus discos, ademais dalgún que outro tema novo. A cita é este mércores 30 de xaneiro ás 21 horas, con entrada de balde.
O sábado 19 Pontevedra acolleu a sétima edición do espectáculo de Cantos na Maré, Festival Internacional da Lusofonía. Saldouse de novo con éxito: pola calidade da proposta musical, o cheo nas butacas do Pazo da Cultura e a sintonía entre público e artistas. Houbo momentos para aplaudir, emocionarse, corear e incluso bailar.
Tito Paris, Raquel Tavares, Fred Martins e Uxía fixeron soar en Pontevedra os ecos da lusofonía, nunha velada na que se cruzaron en interpretacións a dúo, trío e incluso cos catro cantantes no escenario. O concerto púidose seguir en directo desde todo o Estado coa retransmisión en directo de José Miguel López a través de Radio 3. Co precedente da edición brasileira de setembro deste ano, e coa mirada posta xa no 2010, Cantos na Maré volveu amosar que é o gran referente da música e a cultura lusófonas no mundo.
Desde o mércores sucédense os ensaios para a nova edición de Cantos na Maré. Paulo Borges dirixe unha banda na que o acompañan Santi Cribeiro, Ruben Santos, Xacobe Martínez e Quiné. Xunto a Fred Martins, Raquel Tavares, Uxía e Tito Paris ensaian os tempos e depuran o son de cara á cita de mañá sábado. Será ás 21 horas no Pazo da Cultura de Pontevedra.
É novo e ten talento. Tino Barreiro vén de gañar o primeiro premio Gzcrea de carteis, convocado pola Dirección Xeral de Xuventude. O xurado escolleu o seu cartel “Pegadas de historia” como o mellor nunha edición que tiña o Xacobeo como tema. Nunha entrevista na web BriefingGalego.com explica que quixo “representar esa unión tan persoal entre peregrino e camiño”.
Nesa entrevista tamén se lembra do seu paso por Nordesía, onde realizou prácticas no gabinete de comunicación. Por iso non nos sorprende o premio: coñecemos o seu talento e creatividade. Desde aquí desexámoslle sorte no seu futuro profesional e tamén na súa faceta musical, como membro de Os John Deeres.
Fuxan os Ventos actua hoxe mércores 15 de decembro ás 20.30h no teatro do Centro Cultural Caixanova de Vigo. O grupo presentao seu espectáculo Terra de Soños, no que conta coa participación de Uxía, Xavier Díaz, Guadi Galego, Nova Galega de Danza, Rodrigo Romaní, Miguel Lustres, Sabela Rodríguez e Pepe Ferreirós. Fuxan os Ventos foi escollido para protagonizar o Concerto de Nadal da Universidade de Vigo, que organiza cada ano a Vicerreitoría de Extensión Cultural.
